تحدي الأنمي الكبير: 10 ألعاب أنمي للموبايل بجودة "نارية" (أوفلاين وأونلاين)
اسمعني كويس عشان هذا المقال غير أي مقال أنا عملته في القناة، وأنا جاي النهارده أطلق العنان على عالم الأنمي وجايب لكم معايا 10 ألعاب أنمي، مش عارف إزاي دول على الموبايل أصلاً! ألعاب فيها قوة وشراسة وجرافيك ناري وحماس يخليك تعيش جوه المعركة بنفسك. زي مثلاً لعبة سولو ليفلينج اللي حرفياً الجرافيك بتاعها أحسن من الأنمي نفسه، ولعبة دراغون بول ولعبة جوجوتسو كايسن وألعاب تانيين كمان أوفلاين وون بيس عشان ما حدش يزعل. لو أنت بتحب التحولات أو القتالات أو القصص اللي ترفع الأدرينالين عندك، يبقى جهز نفسك يا أسطورة لأن اللي جاي هيذهل!
1. بليتش (Bleach Brave Souls)
أول لعبة معانا هي لعبة بليتش. اللعبة دي كنز أي حد بيحب أنمي بليتش، وهي عبارة عن لعبة أكشن آر بي جي (Action RPG). هتلاقي فيها كل الشخصيات اللي بتحبها زي إيتشيجو وروكيا وبياكويا وشخصيات تانية غيرهم كتير، وكل واحدة ليها حركتها الخاصة وصوتها الرسمي من الأنمي. أسلوب اللعب هنا سريع جداً، بتتحكم في فريق من ثلاث شخصيات وبتنزل ساحة المعركة تضرب وتتحرك وتفعل ضربات خارقة زي البانكاي بالظبط اللي في الأنمي. وفي أطوار لعب كتيرة تانية زي الستوري مود (Story Mode) وتلعب ضد لاعبين تانيين عادي، أو تلعب مع أصحابك وتتنافس معاهم. الجرافيك فيها خرافي والأنيميشن بتاع الحركات يخليك تقول ده فيلم أكيد مش لعبة.
2. جوجوتسو كايسن (Jujutsu Kaisen Phantom Parade)
اللعبة رقم اثنين هي لعبة جوجوتسو كايسن الرسمية لأنمي جوجوتسو كايسن، واللي مجربها هيفهم قد إيه هي خطيرة. هنا بقى بتبدأ القصة من أول ما إيتادوري يوجي قابل جوجو ساتورو، وبتكمل مع كل المعارك اللي عرفناها بس بجرافيك سينمائي ممتاز. اللعبة هنا بتعتمد على القتال بالدور، يعني كل شخصية ليها قدرات وهجوم خاص بها وأنت اللي بتحط الخطة وتختار مين يهاجم الأول. أنا شايف إن الجرافيك بتاع اللعبة دي جرافيك أنمي رسمي والأصوات أصلية 100%، كأنك بتتفرج على حلقة من الأنمي بس أنت اللي بتحرك الأحداث.
3. ذا ليجند أوف نيفلاند (The Legend of Neverland)
اللعبة رقم ثلاثة هي لعبة ذا ليجند أوف نيفلاند. اللعبة دي مشهورة بإن الناس بتفتكرها نسخة من لعبة جينشين إمباكت وده مش عيب على فكرة. دي لعبة عالم مفتوح هتعيش فيها مغامرات في مملكة سحرية مليانة أسرار ووحوش وأماكن مميزة. وهنا بتبدأ بشخصية خاصة بيك بتختار نوع السلاح اللي يعجبك، تبدأ رحلتك واستكشاف خيالية فيها سحر وتكنولوجيا في نفس الوقت. اللعبة فيها مهمات كتيرة وأحداث ضخمة تدخلها مع لاعبين تانيين، والتحكم فيها سلس جداً والجرافيك تحفة بصرية والأصوات والأداء الصوتي ممتاز. فلو بتحب الألعاب اللي فيها استكشاف وقتال وتطوير شخصيتك، اللعبة دي هتقضي عليها وقت طويل جداً.
4. سولو ليفلينج (Solo Leveling: Arise)
اللعبة رقم أربعة هي اللعبة المدمرة لعبة سولو ليفلينج. اللعبة دي رسمياً لكل محبين الأنمي اللي كانوا مستنينها نزلت أخيراً. أنا كنت متكلم عنها في مقال قبل كده بس ما كانتش نزلت في معظم الدول، بس دلوقتي نزلت في كل حتة. اللعبة دي تخليك تعيش قصة سونج جين وو من أول ما كان أضعف صياد لحد ما بقى أقوى واحد في العالم. اللعبة طبعاً فيها جيم بلاي رهيب جداً، هتتحكم في سونج وتفعل ضرباته الخاصة، وطبعاً ينفع تستدعي الظلال عشان تقاتل معاك. اللعبة مترتبة على أحداث المانهوا مش الأنمي نفسه، يعني في أحداث اللعبة هتلاقيها معدية الأنمي. لو حد هيسألني عن الجرافيك بتاع اللعبة، هقول له أكيد خرافة، يعني بص سونج بيقاتل النملة إزاي، بتهيأ لي أحسن من الحلقة نفسها! والمؤثرات البصرية اللي بتستخدمها في القوة بتاعتك هتخليك تحس إنك بتتفرج على الحلقة بجرافيك عالي بس بتتحكم في سونج جين وو. اللعبة طبعاً فيها مهمات وزعماء ومغارات ممكن تدخلهم، وأطوار لعب كتيرة مختلفة، وكل قصة الأنمي بتتقدم باللقطات السينمائية. فمن الآخر، اللعبة دي هتكون ضخمة في عالم ألعاب الأنمي، لازم تحملها.
5. سماش ليجندز (Smash Legends)
اللعبة رقم خمسة لعبة سماش ليجندز. دي لعبة قتال سريع وأكشن تنافسي، كلها قتال سريع جداً ومتعة كبيرة، وحرفياً كل جيم بتلعبه بيخلص في أقل من ثلاث دقائق والحماس فيها بيكون 100%. كل شخصية ليها ضربات خاصة وأسلوب لعب مميز وتحركات بتخليك لازم تكون سريع ورد فعلك عالي. اللعبة فيها أطوار مختلفة زي واحد ضد واحد أو فريق ضد فريق، وحتى في أطوار خاصة شبه الباتل رويال (Battle Royale). والفترة دي عاملين حدث مع شركة ألعاب وجايبين شخصيات جديدة وحركات مرسومة بـ أنيميشن فاخر يخطف العين. فلو بتحب القتالات والتحديات الأونلاين السريعة، اللعبة دي هتعجبك.
6. ون بيس باونتي راش (One Piece Bounty Rush)
سادس لعبة معانا هي لعبة ون بيس باونتي راش. لو بتحب لوفي والطاقم بتاعه أو عالم ون بيس بمعنى أصح، اللعبة دي هتخطفك حرفياً. لعبة ون بيس بتجمع بين القتال الجماعي والسرعة، بيبقى معاك أربع لاعبين وتنزل ساحة المعركة وبيبقى قدامك أربع لاعبين تانيين، والهدف إنك تسيطر على كنوز أكثر منهم وتهزم العدو اللي قدامك. طبعاً كل شخصية ليها حركاتها وقدراتها الخاصة زي اللي في الأنمي. الجرافيك بتاع اللعبة جميل جداً وأسلوب اللعب فيها سهل جداً يخليك عايز تفهم كل الشخصيات. اللعبة فيها مودات كتيرة وأحداث موسمية، وكل فترة بينزلوا شخصيات جديدة من عالم ون بيس. أنتم عارفين عالم ون بيس كبير قد إيه وعايز الناس تنزل تكتبلي تحت في التعليقات متوقعين كنز ون بيس يطلع إيه.
7. جنشن إمباكت (Genshin Impact)
اللعبة رقم سبعة أقل حاجة اتقال عنها إنها أسطورة في عالم الألعاب، يعني اللعبة دي أنا عايز ألعبها من الآخر. ودي اللعبة الغنية عن التعريف لعبة جينشين إمباكت، وهي عبارة عن عالم مفتوح ومغامرات تقمص أدوار ودي بقى رحلة أسطورية هتخطفك من أول ثانية. لعبة جينشين إمباكت بتاخدك لعالم واسع اسمه تيفات، عالم مليان بالسحر والعناصر والمدن اللي كل واحدة فيها ليها طبيعتها الخاص، وشخصيات كأنهم طالعين من أنمي فاخر كده. وهنا أنت بتبدأ الرحلة بدور المسافر اللي أنا فاكر إنك كنت بتدور على أخوك أو أختك، بس وأنت بتدور عليهم تدخل في قصص ومعارك ملحمية ضد قوة خارقة وملوك بيحكموا العالم. اللعبة فيها نظام عناصر عبقري، كل شخصية بتتحكم في عنصر زي النار الثلج الرياح الكهرباء المياه، لا وكمان بتقدر تدمج العناصر مع بعض وتعمل ضربات مدمرة. كل شخصية ليها ستايل وحركات خرافية، طبعاً هينفع تجمع فريق مكون من أربع شخصيات وتبدل بينهم في المعركة على حسب استراتيجيتك. طبعاً كل ما تتقدم هتفتح مناطق جديدة من العالم وتواجه زعماء أقوى، والجرافيك بتاع الأنمي حرفياً تحفة أنمي متحركة! حتى أشوف أنا اتلخبطت بدل ما أقول لعبة قلت أنمي، ده من قوة اللعب أو جمالها. تصميم العالم يخليك عايز تستكشف كل ركن وكل حتة في الخريطة (Map)، فاللعبة دي من أفضل الألعاب اللي أنا جبتها في القناة، لازم تحملها.
8. إيبيك كونكوست 2 (Epic Conquest 2)
اللعبة رقم ثمانية هي لعبة إيبيك كونكوست 2. اللعبة دي ممكن تبان إنها بسيطة بس وراها عالم خرافي وقصة تشدك جداً. وهي عبارة عن لعبة تقمص أدوار وقصة وآر بي جي (RPG)، وطبعاً اللعبة أوفلاين. هنا هتلعب بشخصيات مختلفة، وطبعاً كل شخصية ليها أسلوب خاص بها، ومن هنا بقى تبدأ رحلة طويلة مليانة قتال وتطوير وقصة رومانسية وسحر. وفي قتال سريع وضربات خاصة ومعاك مهارات تقدر تطورها وتخصصها زي ما تحب. اللعبة كمان فيها استكشاف لعالم مفتوح بسيط مليان وحوش وزعماء وأسرار، والأجمد من كده إنها أوفلاين تماماً والجرافيك بتاعها ستايل أنمي جميل وبسيط في نفس الوقت. فلو عايز لعبة أنمي بسيطة وأوفلاين وفيها قصة وتطوير شخصيات، اللعبة دي ممكن تاخد وقتك كله وأنت مش واخد بالك.
9. دراجون بول ليجندز (Dragon Ball Legends)
تاسع لعبة معانا هي لعبة دراغون بول ليجندز. لو أنت بتحب الدراغون بول فأنت اللعبة دي لازم تحملها. لأن اللعبة دي فيها قتالات أسطورية بين كل الشخصيات اللي بتحبهم زي مثلاً عندك جوكو وفيجيتا وجيرين وبرولي، وممكن كمان تلاقي بيروس في اللعبة. بتلعب هنا في فريق من ثلاث شخصيات وتنتقل ما بينهم في وسط المعركة تضرب ضربات عادية وتفعل الكرات اللي معاك عشان تطلع ضربات خارقة. الجرافيك بتاع اللعبة مجنون بمعنى الكلمة، والمؤثرات اللي في اللعبة لما تعمل كامي هامي ها أو فاينال فلاش بتاعة فيجيتا، الصوت والصورة بتاعتهم يخليك تحس فعلاً إنك في المعركة وبتتفرج على أنمي مش لعبة. اللعبة كمان فيها ستوري مود (Story Mode) وأحداث بتتحدث كل شوية، ولو بتحب الدراغون بول اللعبة دي تخليك تغرق في القتال والذكريات.
10. ذا سبايك (The Spike)
اللعبة الأخيرة معانا لعبة ذا سبايك. أنا قلت بقى لما نختم المقال بلعبة أوفلاين. اللعبة دي عبارة عن لعبة كرة طائرة بأسلوب أنمي ياباني، والجرافيك بتاعها اللي هو يعني بسيط وجذاب كده. اللعبة هتخليك متحمس جداً وأنت بتعمل سماش أو بلوك في وش الفريق التاني. وفيها كمان كارير مود (Career Mode) تطور فيه اللاعب الخاص بيك وتبدأ من أول فريق مدرسة لحد ما تبقى البطل بنفسك. التحكم فيها سهل جداً وبسيط لكن في عمق يخليك لازم تتعلم التوقيت الصح وتستخدم المهارات في اللحظة المناسبة، وكمان فيها موسيقى يابانية وحماس كأنك بتتفرج على أنمي هايكيو. والأحسن من كده إنها أوفلاين تلعبها في أي وقت وأنت مرتاح.
تابعوا مدونتنا ليصلكم كل جديد في عالم الألعاب!
